Chwilio am eira
Daeth ymholiad i law yn gofyn tybed faint o leoedd sydd yna yng Nghymru gyda'r gair 'eira' yn rhan o'u henw.
Meddai Bethan - sy'n siwr o fod yr unig un sy'n chwilio am eira y dyddiau hyn:
"Oes yna unrhyw le yng Nghymru ar wahân i Gwm Nant yr Eira ym Maldwyn y mae 'eira' yn elfen yn ei enw?
"Er bod Cymru i gyd dan eira ar hyn o bryd alla i na'r rhai yr ydw i wedi bod yn eu holi ddim meddwl am yr un."
Yn wir mae Bethan yn cael anhawster dod o hyd i enw tŷ neu fferm gydag 'eira' yn rhan o'r enw heb sôn am bentref neu dref.
Yr ydw innau'n crafu mhen hefyd.
Allwch chi helpu - cyn iddi ddadmer?
SylwadauAnfon sylw
Mae'r rhaeadr Sgwd yr Eira yn ne Powys yn cynnwys yr elfen hon a hefyd Maeneira ar lan Afon Dulyn uwchlaw Tal-y-bont, Dyffryn Conwy. O ran tai a strydoedd, mae yna westy o'r enw Gors yr Eira ger Bangor, fferm o'r enw Bryn yr Eira yn ardal Corwen a stryd o'r enw Bryn Eira yn ardal Castell-nedd.
Debyg bod yna ragor, ond dyna'r cyfan y deuthum innau o hyd iddyn nhw.
Bethan Mair
Diolch yn fawr Bethan. Bydd y Bethan arall - yr ymholydd - wrth ei bodd â chymaint o gnwd. Tybed ddaw yna ragor. Tybed oes yna ragor.
Daeth neges arall - ar e-bost - yn tynnu sylw at Ffordd Eira yng Ngorseinon a lle i aros yn Llanfairpwllgwyngyll, Ynys Mon o'r enw Bryn Eira.
Diolch
Glyn