Chwerthin mewn cadair dan goron
Yr oedd byd llên Lloegr fel ci efo dwy gynffon y bore ma wedi i nofel gomedi ennill gwobr Booker neithiwr - y tro cyntaf i gomedi ennill y gystadleuaeth a fu mewn bodolaeth ers deugain a dwy o flynyddoedd.
Disgrifwyd The Finkler Question gan Howard Jacobson fel astudiaeth "laugh-out-loud" o Iddewiaeth.
Roedd hi'n gystadleuaeth glos â'r bleidlais ond yn 3 - 2 o'i phlaid.
Yr ydym ni yng Nghyymru yn ddigon cyfarwydd â llyfrau ysgafn yn ennill ein prif wobrau llenyddol fel Y Fedal Ryddiaith a Gwobr Goffa Daniel Owen.
Ond beth am ein dwy wobr lenyddol FAWR arall? Y Gadair a'r Goron yn yr Eisteddfod Genedlaethol. Oes yna unrhyw enghraifft o gwbl o awdl, pryddest neu gerddi doniol neu gomedi yn ennill un ohonyn nhw? Os oes na, maen nhw'n cadw'n ddistaw iawn am y peth.
Alla i ddim cofio am yr un a dydi'r rhestrau o enillwyr sy'n ymestyn yn ôl i 1880 o ddim help yn hynny o beth.
Bydd angen rhyw wyddoniadurwr eisteddfodol ar ddeutroed i'n goleuo. Anfoned air os mai chi yw!
Ac wrth gwrs y mae digon o amser ar ôl i gyflawni'r gamp yn y flwyddyn nesaf gan nad yw'r ymgeision i fod i mewn tan Ebrill 1 nesaf - Dydd Ffwl Ebrill fel mae'n digwydd.
Am y cyntaf, felly, i gyfansoddi dilyniant o gerddi doniol mewn cynghanedd gyflawn ar y testun gogleisiol Clawdd Terfyn neu ddilyniant o gerddi digynghanedd ar y testun Gwythiennau.
Cyfle heb ei ail i greu hanes!
SylwadauAnfon sylw
Beth am 'Olwynion', a enillodd Coron Eisteddfod Bro Dinefwr 1996?