Yr un bregeth oedd gan feirniaid y fedal ddrama eleni a rhai y llynedd - y dylai'r fedal ddrama sefyll ochr yn ochr â seremonïau'r gadair a'r goron ar brif lwyfan y pafiliwn.
Ar hyn o bryd, mae seremoni y fedal ddrama yn cael ei chynnal yn theatr fach y maes, ac "nid yw hyn yn dderbyniol" yn ôl Branwen Cennard, un o'r beirniaid eleni. Dywedodd bod hyn yn cynrychioli ei barn hithau a'i chyd-feirniad Meic Povey oedd methu bod yn bresennol.
"Y rheswm o bosib yw'r patrwm o ddifyg teilyngdod dros y blynyddoedd, ond pam bod hyn yn digwydd?" gofynnodd.
Cynigodd ddau bosibiliad. Dywedodd yn gyntaf, ei fod yn gamp aruthrol i ysgrifennu drama, a'i fod yn cymryd disgybliaeth lwyr. "Mae'r gofynion yn enfawr a does dim syndod nad oes mwy yn cystadlu," meddai.
Dywedodd hefyd nad gwaith un person fel arfer yw ysgrifennu script ar gyfer y teledu a llwyfan, ond gwaith tîm. Awgrymodd bod angen edrych unwaith eto ar reolau'r gystadleuaeth gan efallai gynnig system fentora ac hyfforddi, fyddai'n codi'r safon drwyddi draw ac yn codi statws y gystadleuaeth yn ogystal.
Cyfaddefodd fod y dyfodol yn edrych yn ddu i ddrama a scriptio yng Nghymru, ac oni bai bod trafodaethau yn dechrau yn fuan, y bydd hi'n amhosib adfer y sefyllfa.
Aeth ymlaen wedyn i drafod cystadleuaeth y ddrama hir. Deg ddrama daeth i law, saith yn y trydydd dosbarth a thri yn yr ail ddosbarth.
"Yn anffodus, roedd y gwendidau yn ddiflas o gyffredin, a'r un mwya' oedd yr anallu i ysgrifennu stori dda," meddai, gan gyhoeddi nad oedd teilyngdod yn y gystadleuaeth.
Pymtheg sgript ddaeth i law yn y gystadleuaeth ddrama fer, 12 yn y trydydd dosbarth, dau yn yr ail ddosbarth ac un yn y dosbarth cyntaf "ac mae diolch mawr mawr amdani".
"Y mae'r ddrama Miri yn sefyll ben ac ysgwydd yn uwch na'r dramâu eraill yn y gystadleuaeth [drama fer] ac yng nghystadleuaeth y ddrama hir."
Cyflwynwyd y fedal ddrama felly i Manon Steffan Ros o Riwlas, Bangor, a oedd yn fuddugol yn y fedal ddrama llynedd hefyd.
Mae ei drama yn sôn am ddau ddieithryn yn cwrdd mewn mynwent yn dilyn cynhebrwng Miriam (Miri) a oedd ar un adeg yn gariad i'r ddau. Wrth iddynt hel atgofion daw yn amlwg fod eu cof amdani yn bur wahanol.
Yn ôl y beirniad camp fwyaf y ddrama yw sut y mae'n creu darlun mor grwn a chyflawn o Miriam heb iddi fod yn bresennol.
"Mae ei phresenoldeb anweledig yn hawlio'r sioe."
popeth a ddisgwylir
"Mae'n cwmpasu popeth a ddisgwylir gan feirniad a chan gynulleidfa ac yn ddi-os saif mewn dosbarth ar ei phen ei hun: drama sydd yn dweud stori dda a'r stori'n cael ei datgelu'n gelfydd . Drama ac ynddi gymeriadau crwn, cymhleth, diddorol, cymeriadau y gellir cydymdeimlo ac uniaethu â nhw a'r rheiny yn gymeriadau wedi eu gosod mewn sefyllfa gwbl gredadwy." Canmolwyd hefyd y defnydd o ddeialog naturiol a gafaelgar.
"Drama sy'n haeddu cael ei gweld, yn wir, drama y bydd disgwyl eiddgar am ei gweld gyda'r posibilrwydd cyffrous o allu ei chynhyrchu mewn aml gyfrwng."
Estynodd y ddau feirniad eu gwerthfawrogiad a'u llongyfarchiadau gan ddweud ei fod yn bleser cyflwyno'r fedel ddrama i Manon.
Ìý
