Â鶹¹ÙÍøÊ×Ò³Èë¿Ú

Mae llefarydd Llafur ar Gymru, Owen Smith wedi amddiffyn polisïau newydd ei blaid, gan ddweud bod costau pob un wedi eu hystyried.

Mae arweinydd y blaid, Ed Miliband yn cyhoeddi nifer o bolisïau yng nghynhadledd flynyddol Llafur, i geisio mynd i'r afael a beth mae'n alw'n "argyfwng" costau byw.

Dywedodd Mr Smith bod costau'r polisïau wedi eu "hystyried yn llawn, a'u talu amdanynt yn llawn".

Mae'r Ceidwadwyr yn dweud y bydd y polisïau newydd yn costio biliynau o bunnoedd i'w gweithredu.

Ymysg y polisïau y mae Llafur yn dweud y byddant yn newid yw'r newid i fudd-dal tai i deuluoedd gyda 'stafell wely sbâr, neu'r 'dreth ystafell wely'.

Mae gwybodaeth gan y Ceidwadwyr yn dweud y byddai angen benthyg £1,000 yn ychwanegol i bob cartref yn 2015, i weithredu newidiadau Llafur.

Ond mae Mr Smith wedi ategu sylwadau Mr Miliband gan ddweud nad oedd hynny'n wir.

"Byddwn yn talu amdano drwy newid cloerdyllau yn y gyfraith, gafodd ei gyflwyno gan y Torïaid, sy'n galluogi talu llai o drethi ar fuddsoddiadau - mae hynny'n £150 miliwn," meddai Mr Smith wrth y Â鶹¹ÙÍøÊ×Ò³Èë¿Ú.

"Byddwn yn cael gwared ar y syniad chwerthinllyd y gall weithwyr werthu eu hawliau am gyfranddaliadau, a chyflwyno newidiadau eraill i gynnig buddion i'r diwydiant adeiladu."

Yn siarad cyn cynhadledd y blaid lafur yn Brighton, dywedodd Mr Smith ei fod yn falch bod Mr Miliband wedi cyhoeddi ei fwriad i gael gwared ar y 'dreth ystafell wely'.

"Ni fydd y polisi yn gweithio oherwydd diffyg tai addas, a ni fydd yn arbed £470m fel mae'r Llywodraeth yn ei ddisgwyl."

"Yn syml mae'n annheg ac yn anghywir."