Â鶹¹ÙÍøÊ×Ò³Èë¿Ú

Mae Mark Drakeford wedi cael ei feirniadu am wrthod cyfarfod un-i-un gyda Theresa May - y cyntaf ers iddo ddod yn brif weinidog - er mwyn teithio i Gaerdydd ar gyfer dathliad gydag aelodau Llafur.

Roedd Mr Drakeford i fod i gyfarfod Mrs May am 14:00 ddydd Mercher, ond fe ddywedodd ei swyddfa hithau bod yn rhaid ei gynnal yn hwyrach yn y dydd gan gynnig ei aildrefnu yn gynnar yr un noson.

Mae Â鶹¹ÙÍøÊ×Ò³Èë¿Ú Cymru yn ddeall bod y cynnig hwnnw wedi ei wrthod oherwydd "ymrwymiad blaenorol yng Nghaerdydd", sef parti diolch i bobl oedd yn rhan o ymgyrch Mr Drakeford i olynu Carwyn Jones.

Dywedodd llefarydd ar ran Llywodraeth Cymru bod yr honiad "yn nonsens llwyr" a bydd y cyfarfod yn cael ei aildrefnu.

Fe wnaeth Mr Drakeford gwrdd â Mrs May - ynghyd â Nicola Sturgeon, prif weinidog Yr Alban a chynrychiolwyr o Ogledd Iwerddon - yn ystod cyfarfod y Cyd-bwyllgor Gweinidogion, gan drafod materion yn cynnwys goblygiadau Brexit heb gytundeb gyda'r UE.

Ond dyw'r ddau heb gael cyfarfod un-i-un ers penodiad Mr Drakeford yn brif weinidog Cymru.

Mae ffynhonnell oedd yn y parti wedi dweud wrth Â鶹¹ÙÍøÊ×Ò³Èë¿Ú Cymru bod Mr Drakeford wedi dweud wrthyn nhw: "Mae Jeremy Corbyn yn gwybod amdanoch chi achos fe wnaethoch chi gynnal ymgyrch ffantastig i fy ethol i.

"Doedd Theresa May ddim yn gwybod amdanoch chi ond mi mae hi nawr oherwydd fe ddywedais i wrthi fod rhaid i mi ddod adref i gwrdd â chi gyd.

"Fe gynigiodd hi un-i-un i mi ond dywedais i fod gen i ymrwymiad blaenorol gyda chi gyd."

Dywedodd AS Plaid Cymru, Jonathan Edwards bod Mr Drakeford wedi "cefnu'n gywilyddus ar ei gyfrifoldeb".

"Ar ddiwrnod oedd yn nodi 100 niwrnod cyn Brexit, roedd y prif weinidog o'r farn bod hi'n fwy addas i yfed siampên gyda'i fêts na sicrhau llais i Gymru yn San Steffan," meddai.

"Mae rhoi eich plaid wleidyddol o flaen eich gwlad yn warthus, mae rhoi dathliad o flaen eich gwlad yn wallgofrwydd."

Dywedodd arweinydd y Ceidwadwyr yn y Cynulliad, Paul Davies nad oedd hwn yn "ddechrau da" i Mr Drakeford.

"Mae'n hollbwysig bod gyda ni unigolyn ymroddgar sy'n fodlon mynd i'r eithaf i sicrhau bod pobl Cymru'n cael eu cynrychioli ar y lefel uchaf.

"Rwy'n gwerthfawrogi bod gydag e ymrwymiadau eraill ond siawns y gallai fod wedi aildrefnu'r parti gan y dylid blaenoriaethu trafodaethau gyda'r prif weinidog."

Mewn ymateb i'r feirniadaeth dywedodd llefarydd ar ran Llywodraeth Cymru: "Mae hyn yn nonsens llwyr.

"Fe wnaeth Prif Weinidog Cymru gwrdd â'r Prif Weinidog ddoe ac mae hefyd wedi cael trafodaeth fanwl gyda hi dros y ffôn yn gynharach yn yr wythnos.

"Roedd cyfarfod rhwng y ddwy ochr yn gynnar yn y dydd ddoe wedi ei drefnu, ond bu'n rhaid i'r Prif Weinidog aildrefnu ar fyr rybudd oherwydd ymrwymiadau eraill. Bydd y cyfarfod yn cael ei aildrefnu."