Â鶹¹ÙÍøÊ×Ò³Èë¿Ú

Mae'r adran bropiau y tu ôl i'r gyfres deledu His Dark Materials wedi dechrau gwneud offer gwarchod personol ar gyfer gweithwyr iechyd.

Mae'r argraffwyr 3D a greodd yr alethiometer - neu'r cwmpawd euraidd - bellach yn cael eu defnyddio i wneud masgiau wyneb plastig ar gyfer meddygon sy'n delio â phandemig Covid-19.

Cwmni cynhyrchu Bad Wolf yng Nghaerdydd sy'n cynhyrchu'r rhaglen sy'n seiliedig ar lyfrau Syr Philip Pullman.

Daw hyn yn dilyn y newyddion bod adran wisgoedd y gyfres wedi bod yn cynhyrchu dillad meddygol.

Dywed rheolwr gwisgoedd His Dark Materials, Dulcie Scott, fod yr ymgyrch wedi "tyfu a thyfu" ar ôl iddi sefydlu tudalen i godi arian sydd bellach wedi derbyn gwerth degau o filoedd o bunnoedd o roddion.

"Ar hyn o bryd, mae gennym ni tua 150 o bobl yn gwneud scrubs. Mae gennym ni tua 6,500 set o scrubs naill ai wedi'u cwblhau a'u danfon neu'n cael eu gwneud, ac mae gennym ni fwy o ffabrig ar y ffordd."

Mae criwiau o gynyrchiadau ledled y DU wedi bod yn cysylltu â Dulcie yn cynnig eu gwasanaeth.

"Mae criw Batman yn ein helpu, mae tîm Sex Education wedi cysylltu â ni, y tîm yn Lerpwl a weithiodd ar Poldark ac mae gennym ni dair merch o Opera Cenedlaethol Cymru hefyd."

Mae'r gwirfoddolwyr wedi'u gwasgaru ledled y DU ac yn helpu eu hysbytai lleol.

Mae Isabelle Conaghan, oedd yn gynorthwy-ydd dylunio ar His Dark Materials, yn cydlynu'r ymgyrch yn ne Cymru.

Mae hi wedi danfon dillad i Ysbyty Brenhinol Gwent a Hosbis Marie Curie ym Mhenarth ac mae wrthi'n danfon i Ysbyty Brenhinol Morgannwg, Ysbyty Athrofaol Cymru, Ysbyty Tywysoges Cymru ac Ysbyty Treforys.

"Ry'n ni i gyd yn gweithio o adref, sy'n amlwg yn hollol wahanol i fod mewn stiwdio lle mae gennym ni adran gwisgoedd enfawr. Mae ein ffabrig wedi'i gymeradwyo gan y GIG. Dyma'r ffabrig o'r ansawdd uchaf ac mae gennym wneuthurwyr gwisgoedd o'r ansawdd uchaf yn y DU yn eu gwneud."

Yn dilyn llwyddiant yr ymgyrch, mae aelodau eraill y criw o His Dark Materials wedi bod yn cynhyrchu masgiau wyneb plastig.

Defnyddiodd Michael van Kesteren beiriant argraffu 3D ym mhroses ddylunio'r alethiometer, un o brif bropiau'r ddrama.

"Aeth y 50 masg cyntaf i mi greu i Ysbyty'r Brifysgol. Mae bron fel dyletswydd.

"Mae'n rhaid i mi wneud hyn neu fel arall bydd y bobl hyn sy'n ceisio achub bywydau pobl eraill yn dioddef eu hunain."

Mae ail gyfres His Dark Materials bellach yn y broses ôl-gynhyrchu ar ôl i'r ffilmio gael ei gwblhau yn gynharach eleni.