Â鶹¹ÙÍøÊ×Ò³Èë¿Ú

Mae bron i bob achos coronafeirws yng ngogledd Cymru bellach yn achosion o'r amrywiolyn Delta, yn ôl Iechyd Cyhoeddus Cymru.

Mae'r amrywiolyn, a ddaeth i'r amlwg yn India yn wreiddiol, yn parhau i fod y straen mwyaf cyffredin yng ngogledd Cymru - gydag achosion yn agos at 100 fesul 100,000 mewn rhai ardaloedd.

Yn Sir y Fflint, mae'r gyfradd achosion saith diwrnod bellach yn 99.9, yng Nghonwy mae'n 88.7, yn Sir Ddinbych mae'n 72.1, ac yn Wrecsam mae 51.5 o achosion fesul 100,000.

Mae'n debygol bod y cynnydd yn yr ardaloedd hyn yn gysylltiedig â theithio ar draws y ffin â gogledd-orllewin Lloegr.

Mae pobl yn y gogledd yn cael eu cynghori i gadw pellter cymdeithasol, i dderbyn y cynnig o frechlyn, ac i hunan-ynysu a chael prawf os byddant yn cael unrhyw symptomau coronafeirws.

Cyfanswm nifer yr achosion o amrywiolyn Delta yng Nghymru gyfan yw 788, sef cynnydd o 209 ers y diweddariad diwethaf ddydd Llun 21 Mehefin.

Dywedodd Dr Eleri Davies, Cyfarwyddwr Digwyddiad ICC: "Mae'n wybyddus mai amrywiolyn Delta yw'r mwyaf cyffredin ym mhob achos newydd yng Nghymru a dangoswyd ei fod yn cael ei drosglwyddo'n haws o berson i berson na'r amrywiolyn amlycaf blaenorol, sef Alffa.

"Mae hyn yn golygu bod angen i ni gyd gymryd camau i gadw ein hunain yn ddiogel a lleihau'r risg o drosglwyddo.

"Mae ein cyngor yn arbennig o berthnasol i bobl sy'n teithio i ardaloedd lle mae clystyrau hysbys o'r coronafeirws oherwydd bod trosglwyddo'r amrywiolyn yn y gymuned yn amlwg."

Ychwanegodd: "Rydym yn gweld achosion yn cynyddu dros Gymru ond yn enwedig yng ngogledd-ddwyrain Cymru lle mae teithio i Loegr ar gyfer gwaith a hamdden ac oddi yno yn gyffredin.

"Byddwch yn ymwybodol o Covid pan fyddwch yn teithio. Rydym i gyd yn gyfarwydd iawn â chadw pellter cymdeithasol erbyn hyn, ond, drwy gadw o leiaf dau fetr i ffwrdd oddi wrth bawb arall, golchi ein dwylo'n rheolaidd, a gwisgo gorchudd wyneb gallwn gadw ein hunain a'n ffrindiau a'n teulu'n ddiogel.

"Derbyniwch y cynnig i gael brechiad pan fyddwch yn ei gael, oherwydd bod y dystiolaeth ddiweddaraf yn dangos bod brechlynnau Pfizer ac AstraZeneca yn effeithiol yn erbyn amrywiolyn Delta ar ôl dau ddos.

"Mae awyru lleoedd dan do yn ffordd effeithiol arall o leihau lledaeniad yr haint, felly drwy agor ffenestri a drysau, gallwn ddiogelu ein hunain ymhellach.

"Os byddwch yn datblygu unrhyw symptomau Covid, rhaid i chi hunan-ynysu a chael prawf os ydych chi neu unrhyw un arall yn eich aelwyd yn datblygu symptomau."