Â鶹¹ÙÍøÊ×Ò³Èë¿Ú

Mae heintiadau Covid yn parhau i godi yng Nghymru, er gwelwyd llai o gynnydd na'r wythnos gynt.

Yn ôl arolwg swab wythnosol y Swyddfa Ystadegau Gwladol, amcangyfrifir bod 68,500 o bobl â'r feirws yn yr wythnos hyd at 18 Mehefin.

Mae hyn yn cymharu â 64,800 yn yr wythnos flaenorol - sef 2.25% o'r boblogaeth, neu un o bob 45 person.

Yn ystod anterth ton Omicron ddechrau fis Ionawr, yr amcangyfrif oedd bod 169,100 o bobl wedi'u heintio.

Mae'r ffigyrau'n dangos fod lefel yr haint yn is yng Nghymru na gwledydd eraill y DU, a holl ranbarthau Lloegr ar wahân i'r gogledd-ddwyrain.

Mae'r heintiadau ychydig yn uwch ar gyfer pobl yn eu 30au ac ar eu hisaf ymysg y rhai dros 70 oed.

Bu cynnydd diweddar yn nifer y cleifion â Covid yn yr ysbyty, sy'n adlewyrchu'r cynnydd mewn heintiau cymunedol.

Ond ar gyfartaledd, yn ystod y saith diwrnod diwethaf, dim ond 28 o gleifion oedd mewn gwirionedd yn cael eu trin am Covid mewn ysbytai yng Nghymru, gyda thua 40% o gleifion â Covid yn yr ysbyty wedi'i ddal tra roedden nhw yno.

Roedd cyfartaledd o wyth o bobl mewn gofal critigol gyda Covid - y nifer isaf ers mis Gorffennaf 2021.