Â鶹¹ÙÍøÊ×Ò³Èë¿Ú

Yn ystod yr wythnosau diwethaf mae dolffiniaid yn nofio'n agos at y glannau wedi dod yn rhywbeth cyffredin iawn yn y gogledd.

Mae sawl adroddiad fod dolffiniaid yn mentro'n agosach at lan y môr ac yn ymddangos yn agos iawn at gychod.

Mae adroddiadau fod dolffiniaid wedi'u gweld ym Mae Caernarfon, Ynys Seiriol ac oddi ar Ynys Môn ger Rhosneigr.

Pam felly fod gweld y dolffiniaid hyn yn rhywbeth fwy cyffredin na'r arfer?

Yn ôl yr Yr Athro Peter GH Evans, arbenigwr dolffiniaid a chyfarwyddwr y Sea Watch Foundation, mae'r tywydd braf yn sicr yn ffactor.

"Mae tri math o ddolffiniaid yn yr ardal. Y Dolffin Cyffredin, Dolffin Risso a'r Dolffin Trwynbwl.

"Mae'n beth cyffredin i weld dolffiniaid ond mae sawl un cael cael eu gweld yn nes at y lan yn ddiweddar.

"Mae diwedd mis Gorffennaf i fewn i fis Awst yn gyfnod prysur i'r dair rhywogaeth yng nghanol y môr, ond mae'n beth anarferol i'w gweld nhw mor agos at y lan," meddai.

Un o'r rhai welodd y dolffiniaid yn nofio ym Mae Caernarfon oedd Llio Non.

Dywedodd wrth Cymru Fyw: "Mynd â Tomi, ci ffrind am dro o'n i, a chlywed sblashis mawr yn dod o rwla a throi rownd i weld dolffin yn dawnsio yng ngheg afon Seiont cyn nofio i gyfeiriad y pontydd i Sir Fôn.

"Dwi mor falch nad o'n i'n gwisgo headphones," meddai.

Roedd Sion Edwards ar y dŵr ei hun pan welodd o'r dolffiniaid.

"Roeddwn ar y gwch yn pysgota allan o Rosneigr.

"Dolffiniaid yn heidio mecryll at ei gilydd i fewn Fae Caethle er mwyn bwydo arnynt.

"Roedd o'n gyfle i gael seibiant ar y pysgota a gwylio’r pros wrthi," meddai.