�鶹������ҳ���

Ar raglen Drych ar S4C nos Sul y 23ain o Ebrill fe fyddwn ni’n dod i adnabod dyn ifanc ysbrydoledig o Danygrisiau yng Ngwynedd.

Mae Terry Tuffrey yn 22 mlwydd oed ac mae ganddo anawsterau dysgu cymedrol. Ei freuddwyd yw bod yn DJ a dros y flwyddyn ddiwethaf mae camerâu Cwmni Da wedi bod yn ei ddilyn wrth iddo raddio a mynd amdani i geisio gwireddu ei freuddwyd.

Cafodd Aled Hughes o �鶹������ҳ��� Radio Cymru sgwrs gyda Terry am ei raglen a’i ddyheadau eraill ar gyfer y dyfodol.

“Dros y flwyddyn ddwytha’ mae Cwmni Da wedi bod yn hollol wych efo fi oherwydd maen nhw wedi bod yn ffilmio fi’n mynd i wahanol lefydd ac yn ffilmio fy niddordebau i. Ond y prif ddiddordeb sydd gen i wrth gwrs ydi DJio.”

Mae’n angerddol dros gerddoriaeth a dyna sy’n bwydo ei awydd i fod yn DJ meddai,

“Be’ dwi'n gael o gerddoriaeth ydi pleser yn fwy na dim. Os ydach chi, fel petai, yn cael diwrnod anodd neu drist a dydach chi jyst ddim isio gwneud dim byd, ond 'wyrach mynd am dro a gwrando ar fiwsig. Mi fyswn i bendant yn gwrando ar fiwsig... achos neith o wir godi eich ysbryd chi.”

A pha gerddoriaeth sy’n mynd â’i fryd?

“Pwy dwi'n licio yn canu ydy Elin Fflur wrth gwrs. Ges i y fraint a’r anrhydedd o ganu gyda hi ar 'Canu Gyda Fy Arwr'. A Gai Toms. Ddim yn unig mae o efo caneuon da ond mae o hefyd yn byw yn agos iawn ar stepan drws fi! Ia, a wedyn yn y byd canu Saesneg dw i’n licio Little Mix achos maen nhw wastad yn canu caneuon hapus lle dach chi’n gallu dawnsio iddyn nhw.”

Yn rhan o’r rhaglen mae Terry wedi bod yn ei ffilmio fe fuodd o yn y �鶹������ҳ��� ym Mangor yn dysgu am gynhyrchu radio a chyd-gyflwyno yn fyw ar yr awyr. Holodd Aled o a oedd hynny wedi selio’r freuddwyd o fod yn DJ?

“Dw i’n gwybod sut mae radio a cerddoriaeth yn cael ei llwytho mewn i wahanol raglenni radio sydd yn wych. Dw i wedi cael cynnig profiad gwaith yn y �鶹������ҳ��� yn ddiweddar felly dw i’n siŵr unwaith y bydda i’n cael ‘chydig fwy o brofiad mi fydda i’n ddigon aeddfed i allu gwneud y penderfyniad cywir i mi. ”

Ond nid dim ond cerddoriaeth a DJio sy’n cadw Terry’n brysur y dyddiau hyn. Mae wedi dechrau dysgu Sbaeneg am fwy nag un rheswm.

“Mae dysgu Sbaeneg wedi dod yn bwysig iawn i mi hefyd dros y blynyddoedd dwytha ‘ma oherwydd mae gynnon ni gartra ein hunain drosodd yn Tenerife a ‘dan ni’n licio mynd drosodd yna o leia’ unwaith y flwyddyn.

“Mae dysgu Sbaeneg pan ‘da chi drosodd yn Sbaen yn teimlo i fi yn hynod o bwysig achos, yndi mae’r iaith Saesneg yno, ond weithiau ‘wyrach eich bod chi angen mynd i rywle gwledig neu gyfarfod pobl sydd ddim yn gallu siarad Saesneg, so os ‘dach chi yn gallu siarad Sbaeneg wel o leia’ ‘dach chi’n gallu conversio hefo nhw sy’n beth da iawn iawn.”

Ond yn yr hydref eleni, fel fydd Terry yn cael cyfle arall i ymarfer ei Sbaeneg gan ei fod yn mynd i Batagonia.

“Dw i’n mynd i Patagonia adeg Eisteddfod y Wladfa. Rydw i wedi ennill ysgoloriaeth i fynd i Patagonia trwy Gyngor Tref Ffestiniog.”

Yn ei gais am yr ysgoloriaeth roedd angen iddo nodi beth hoffai ei wneud tra’i fod o yno.

“Y tair elfen nes i ddewis ohonyn nhw ydy i ganfod mwy am anableddau mewn ysgolion, ffendio allan am sefydliadau amgylcheddol newid hinsawdd a hefyd y trydydd elfen ydy ymweld â Chlwb Rygbi y Ddraig Goch yn y Gaiman i drio cadw’r cysylltiad Cymreig i fynd rhwng Patagonia a Chymru.”

Gallwch glywed sgwrs Terry ac Aled ar �鶹������ҳ��� Sounds.

Bydd Drych: DJ Terry ar S4C am 21:00 nos Sul, Ebrill 23 ac ar gael ar S4C Clic a �鶹������ҳ��� iPlayer wedi hynny.

Hefyd o ddiddordeb