Â鶹¹ÙÍøÊ×Ò³Èë¿Ú

Gallai fod yn ergyd i dwristiaeth Ynys Môn pe byddai miloedd o adeiladwyr Wylfa Newydd yn cael eu cartrefu'n lleol, yn ôl pennaeth cwmni twristiaeth.

Mae trydydd ymgynghoriad ar y prosiect gwerth £10bn yn cael ei gynnal ar hyn o bryd.

Bydd hyd at 8,000 o weithwyr yn rhan o'r gwaith adeiladu, ac fe fydd tua 4,000 o'r rheiny ar un campws arbennig.

Dywedodd y datblygwr mai dim ond 3% o ddarpariaeth leol fyddai gweddill y gweithwyr yn ei gymryd.

Cyn cyfarfod ddydd Iau, fe rybuddiodd pennaeth Twristiaeth Gogledd Cymru, Jim Jones yn erbyn defnyddio llety gwyliau.

"Mae datblygiad Wylfa Newydd yn fuddsoddiad enfawr i economi Môn ac mae ganddo'r potensial o fod yn gatalydd grêt," meddai.

"Ond mae perygl hefyd, os oes miloedd o weithwyr yn cael eu cartrefu mewn llety gwyliau ar draws yr ynys, y gallai fod yn gam yn ôl i'n diwydiant twristiaeth."

Mae'r cwmni y tu ôl i'r orsaf bŵer - Pŵer Niwclear Horizon - yn gobeithio cyflwyno cais cynllunio swyddogol yn ddiweddarach yn y flwyddyn.

Pan yn weithredol, mae disgwyl i Wylfa Newydd greu 850 o swyddi parhaol, ac mae Horizon yn gobeithio dechrau cynhyrchu pŵer erbyn 2025.

Yr amcangyfrif yw y gallai hyn fod gwerth mwy na £20m y flwyddyn i'r economi leol, a hynny mewn cyflogau'n unig.

Dywedodd Richard Foxhall o Horizon eu bod yn "ymwybodol o'r pryderon yn y sector llety", a'u bod yn croesawu pobl i roi eu barn yn ystod yr ymgynghoriad.

"Ond, rydyn ni'n credu'n gadarn y bydd ein cynigion mwy cryno - fydd yn gweld gweithwyr adeiladu'n cael eu cartrefu ar un safle yn hytrach na phump - yn haws i'w reoli ac yn lleihau unrhyw effeithiau ehangach posib ar draws yr ynys," meddai.

Dywedodd y cwmni y byddai hyd at 4,000 o adeiladwyr yn cael eu cartrefu ar un campws, fyddai'n cael ei adeiladu'n arbennig ar eu cyfer.

Mae'n gobeithio y bydd 2,000 yn bobl leol fyddai'n teithio i'r gwaith o gartref, ac y bydd y gweddill - rhwng 2,000 a 3,000 - yn byw mewn llety wedi'i rentu neu ar gyfer twristiaid.