Hud a lledrith: Straeon buddugol Radio Cymru

Ffynhonnell y llun, Valériane Leblond

Disgrifiad o'r llun, Clawr un o straeon buddugol y gystadleuaeth

4 Gorffennaf 2024

Mae'r cyflwynydd Aled Hughes wedi cyhoeddi enwau'r tri awdur ifanc sydd wedi dod yn fuddugol yn ei gystadleuaeth ysgrifennu stori ar �鶹��ҳ�� Radio Cymru.

Mae'r artistiaid Valériane Leblond, Joshua Morgan (Sketchy Welsh) a Huw Griffiths wedi creu cloriau ar gyfer straeon y tri enillydd sef Jesica o Ysgol ID Hooson, Gruffudd o Ysgol Bro Preseli, a Dylan o Ysgol Gynradd Gymraeg Pen-Y-Groes.

Gofynion y gystadleuaeth oedd ysgrifennu stori dan y thema hud a lledrith.

Ffynhonnell y llun, Sioned Birchall (Camera Sioned)

Disgrifiad o'r llun, Casia Wiliam

Beirniad y gystadleuaeth oedd yr awdures Casia Wiliam.

Meddai Casia: "Cafwyd straeon am ddreigiau, straeon am swynion, straeon am gypyrddau hud a gwrachod drwg. Daeth pob math o straeon yn llawn hud a lledrith i law eleni, a'r rheiny'n llawn antur a hwyl!

"Y rhai oedd yn aros yn y cof, ac felly'n dod i'r brig i mi oedd y rhai â syniadau gwreiddiol, gwahanol.

"Mae'r straeon buddugol yn dangos hoel meddwl, iaith afaelgar, a llais clir, unigryw yr awduron. Gobeithio y bydd pawb yn mwynhau'r straeon gymaint ag y gwnes i!"