 |
 |
Brwydr bechgyn Wilmots
Sian Elin Dafydd yn ysgrifennu o Frwsel
Dydd Llun, Gorffennaf 1, 2002
|
Belg a Chwpan y Byd
Dwi ymhlith nifer sydd wedi cadw llygaid ar holl ddrama Cwpan y Byd.
Nid 'falle o safbwynt y chwarae chwim ond o safbwynt yr ymateb, yr angerdd, y siom ar dathlu.
 Gan fod Brwsel yn le amlddiwylliannol roedd hi yn anorfod yn ystod y chwech wythnos ddiwetha' wrth ymweld â chaffi neu far, fod rhywrai yn gweiddi'n groch neu'n rhegi mewn nifer o ieithoedd!
Ar sawl achlysur fe welais i amryw o gefnogwyr y Diawliaid Cochion yn crwydro strydoedd Brwsel wedi cael un bierre blanche yn ormod ac roedd y disgwyliadau'n uchel yn enwedig ar ôl iddyn nhw guro Rwsia 3 - 2.
Chwifiai'r baneri trilliw o ffenestri'r ddinas yn eiddgar ac roedd y ddinas yn fôr o liwiau wrth i gymunedau o Sbaen i Senegal ddatgan eu cefnogaeth a chodi eu baneri hefyd.
Gwawriodd y dydd pwysig i dîm Gwlad Belg, arafodd bywyd y ddinas yn raddol ac erbyn amser cinio roedd 'na deimlad arallfydol ym Mrwsel.roedd Marc Wilmots a'i ddynion dewr yn cwrdd â dewiniaid Brasil.
Roedd y strydoedd, metros a'r trams yn wag a chriwiau o bobl wedi hen ymgynnull mewn bariau di-ri ac o'r diwedd roedd haul Rio wedi cyrraedd gogledd Ewrop!
Er bod y chwarae allan yn Kobe roedd paratoadau mawr ar waith yn y ddinas ac wrth i Wlad Belg ddod wyneb yn wyneb â Brasil gwasgodd tua 10,000 o gefnogwyr i'r Grand Place i wylio'r gêm ar sgrîn fawr a godwyd yn arbennig ar gyfer yr achlysur.
Roedd yr awyrgylch mor boeth â thraeth Copacabana a'r sgwâr hynafol yn llawn cefnogwyr yn gobeithio am y gorau.
A chwarae teg i'r cythreuliaid coch, cafwyd chwarae digon eofn a dim ond ar ôl 67 o funudau llwyddodd Rivaldo i sgorio.
Mae rhai'n dal i sôn am y gôl a waharddwyd yn yr hanner cyntaf pan lwyddodd y capten, Wilmots, i daro'r bêl i'r rhwyd gyda'i ben!
Roedd yna gytuno fod Gwlad Belg wedi gadael y gystadleuaeth yn urddasol ond roedd y siom yn amlwg - doedd dim ceir yn gyrru o amgylch yn canu eu cyrn yn ddi-baid ac aeth y cefnogwyr mewn hetiau trilliw o'r golwg, yn ôl yn ddi-gwpan i ddiflastod bywyd bob dydd.
 Ond dathlu fu'r Brasiliaid ac mae dros 1,700 ohonynt yma ym Mrwsel, yn weithwyr, myfyrwyr a theuluoedd, a dyma genedl sydd yn gwybod yn iawn sut i fwynhau!
Er fy mod wedi croesi fy mysedd ac wedi cefnogi'r cochion roeddwn yn reit falch, yn dawel fach wrth gwrs, mai Brasil fyddai'n cwrdd â Lloegr yn y rownd nesa gan ei bod hi wedi canu ar Loegr cyn iddyn nhw gychwyn â'r dewiniaid gwyrdd yn siwr o chwarae eu castiau gyda'r bêl - a dyma nhw yn awr yn bencampwyr y byd am y pumed tro!
|
|
