 |
 |
Lle cyfyng i farw
Sian Elin Dafydd yn ysgrifennu o Frwsel
Dydd Llun, Medi 30, 2002
|
Mae'n digwydd inni gyd ond prin iawn yw'r bobol sy'n edrych ymlaen ato.
Mae'n rhywbeth hollol gyffredin sy'n croesi pob ffin boed yn liw croen, iaith neu'n ddiwylliant.
Gweld eu hunain yn marw
Mae pawb, yn hwyr neu'n hwyrach, (ac yn hwyr iawn iawn yn fy achos i gobeithio!!!) yn cael ymweliad gan yr hen Angau a'i Gleddau Glas!
Droeon dwi wedi darllen hanes nifer yn honni iddynt farw wrth dderbyn llawdriniaeth gyda disgrifiadau anelwig o angylion yn eu croesawu!
Dwedant iddynt godi uwchben eu cyrff eu hunain gan weld y cyfan sy'n digwydd o'u cwmpas cyn ei heglu hi i gyfeiriad twnel o olau.
Yn bersonol rwy'n ddigon parod i aros yma cyn mentro ar hyd unrhyw dwnel deniadol!
Ond, o ddifrif, wrth fynd yn hynach ac yn enwedig ar ôl cael plant mae meidroldeb dyn yn dod yn fwy amlwg rywsut, mae'n rhaid meddwl gwneud ewyllys a thrafod y pethau "pe bai".
Drwy'r ffenast
Rai dyddiau yn ôl, yn hollol ddi-rybudd, fe'n hatgoffwyd o 'brosesau' naturiol bywyd.
A hithau'n fore braf o hydref, cerddai'r plant a minnau i lawr y stryd i gyfeiriad y car - y ddwy fach yn hel straeon am eu ffrindiau.
Sylwais ar ambiwlas ar gornel y Rue Gerard ond yn fy mhrusurdeb anghofiais y cyfan am y cerbyd a dychwelais o'r ysgol a mhen yn llawn manion bob dydd.
Wrth barcio nôl ar y stryd gwelais gerbyd mawr tebyg i winsh yn tynnu rhywun allan o ffenest llawr ucha ty cyfagos a sylweddolais mai corff marw oedd yn cael ei symud gan y gweithwyr.
Tai uchel a chul
Yma ym Mrwsel, oherwydd siap y tai, (yn bensaerniol mae nifer ohonynt yn uchel ac yn gul) fe symudir y cyfan, yn gelfi neu'n gyrff drwy ffenestri.
Sefais yno'n gwylio'n geg agored a phawb arall heblaw am y teulu yn bwrw ati'n brysur i fynd o amgylch eu pethau a throdd y traffig yn un rhibidi res er mwyn darganfod ffordd arall o gyrraedd pen y daith.
Meddyliais yn hir am yr hyn welais a thrafodais yr olygfa foreuol gyda ffrind sydd wedi byw sawl blwyddyn yma.
Chwarddodd wrth glywed fy stori brudd. Roedd y math yma o beth yn hollol gyffredin meddai.
Cynnal y marw
Roedd hi wedi rhannu lifft gyda tri gwr unwaith - gyda'r ddau ddyn byw yn pwyso ar yr un ymadawedig er mwyn ei gadw i fyny ar ei daith i lawr!
Arferai fyw mewn bloc uchel o fflatiau a dyma'r unig ffordd o symud y meirw allan o'r adeilad. Does dim rhyfedd felly bod y rhai hynaf yn fy nheulu yn byw mewn byngalos!
Mae systemau ail-gylchu Brwsel yn arbennig o dda ac fe ail-gylchir popeth o garton sudd oren i organau dynol.
Rhoi organau
Dysgais ffaith ddiddorol yn sgil y cyfan. Rhagdybir fod pawb sy'n byw yng Ngwlad Belg, yn Felgiaid ac yn bobol ddwad sydd wedi treulio chwe mis yma, yn rhoi eu horganau i wyddoniaeth feddygol ar eu marwolaeth.
Rhaid gwneud cais i gadw organau yma yn hytrach na'u rhoi! Mawr obeithiaf y byddaf i yn cadw fy holl organau yn ystod fy nghyfnod ym Mrwsel - gan gynnwys fy organ geg!!!!!
|
|
