 |
 |
Celfyddyd plagio
Sian Elin Dafydd yn ysgrifennu o Frwsel
Dydd Llun, Ebrill 22, 2002
|
Mae'n codi braw arnai.
Ar ryw adeg yn ystod y flwyddyn ddiwetha' mae'r ferch ifanca' sy'n bedair oed wedi dod i adnabod Britney Spears.
 Mae'n gallu enwi aelodau S Club 7 heb ddim problem na help gan ei chwaer fawr.
Mae'r adnabyddiaeth o'r 'sêr' yn fy mhoeni ychydig ond bellach mae fy nwy fach annwyl wedi troi i fod yn fodau sy'n bencampwyr ar blagio - i ddweud y gwir gallent swnian dros Gymru - a tase'r categori yma'n bodoli yng ngemau'r gymanwlad, byddai un yn derbyn y fedal aur a'r llall yn cael yr arian!
Bellach, fel bodau ifanc, mae'r ddwy yn cael eu targedu'n gyson i hoffi rhyw fwyd, dillad a nwyddau arbennig sy'n glwm â rhaglenni, ffilm neu bersonoliaethau.
Cenhedlaeth Blue Peter a Shep
Yn bersonol fe gymerodd flynyddoedd i fi gofio enwau cyflwynwyr Blue Peter. Shep y ci oedd y peth mwya cofiadwy a phrin oedd y nwyddau atodol nôl yn oes yr arth a'r blaidd.
Roedd gan bob plentyn bach Cymreig da ei lyfr llofnodion a fyddai'n gweld golau dydd mewn eisteddfodau - ond yn anffodus doedd casglu enwau selebs' blinedig Cymru ddim yn fy ysbrydoli i o gwbl!
Y teledu a'r sgrîn fawr yw arfau pwysicaf cwmnïau wrth iddynt dorri mewn i fyd plant.
Yn y gorffennol crewyd nwyddau oherwydd poblogrwydd cyfres ond nawr mae'r sioe a'r cynnyrch yn un, mae'n un ymgyrch farchnata fawr.
Plagio yn fusnes
Mae plagio yn fusnes sy'n dwyn elw oherwydd mae plant bellach yn dylanwadu ar rieni ac yn pwyso arnynt i brynu iogwrt Tweenies neu siocled Harri Potter.
Dyma'n union sy'n digwydd i mi a dwi'n crynu yn fy sgidie pan ddaw'r plant i siopa 'da fi mewn archfarchnad.
Mae'r siop leol yn cynnig trolîs bach i blant ac mae'r ddwy yn rasio rownd yn llenwi fel tasent yn gystadleuwyr ar Supermarket Sweep!
A dwi wastad yn gorfod eu gwagio a stwffio brogaod siocled Harri Potter, pethe gwallt Britney Spears, siampw Barbie a sticeri Disney nôl ar y silffoedd.
Apêl angenfilod
Ar ddechrau gwyliau'r Pasg fe es i a'r merched i weld y ffilm Monsters Inc ym Mrwsel cyn mynd i Lisbon ar wyliau.
Oherwydd iddynt weld hwn llwyddodd y ddwy i berswadio'u tad (sy'n cytuno i unrhyw beth ar ôl cael cusan ganddynt!) i brynu grawnfwyd Monsters Inc i frecwast, jyst er mwyn gweld pa bethau rhad ac am ddim oedd yn y bocs!
Fe blygais innau hefyd i'r poeni parhaus a phrynwyd llyfr lliwio yr angenfilod iddynt - oherwydd y tywydd gwlyb yn Lisbon i chi gael deall!
Bellach mae marchnata i blant yn debyg iawn i farchnata i oedolion gan fod eu dillad a'r ffordd maent yn treulio'u hamser hamdden yn debycach.
Mae nifer fawr o sianelau lloeren yn bwrpasol ar gyfer plant, felly mae'r cyfryngau yn rhan bwysig o'u bywydau.
Rheoli dylanwad y sgrîn
Mae rhai gwledydd Ewropeaidd yn ceisio rheoli y dylanwadau yma fwyfwy ac yn Sweden a Norwy 'dyw cwmnïau ddim yn cael hysbysebu a thargedu plant sydd o dan 12 oed ar y teledu ac mae'r ddwy wlad am weld sefyllfa debyg yng ngweddill gwledydd yr Undeb.
Yng Ngwlad Groeg does dim hysbysebion ar gyfer teganau yn cael eu darlledu rhwng saith y bore a deg y nos.
Dwi'n deall ein bod yn byw yn oes y cyfryngau ond dydw i ddim eisiau i'r plant droi'n oedolion bach a thyfu i fyny heb fwynhau pethau plentynnaidd.
Mae angen gwisgo dillad sydd ddim yn mynd â'i gilydd, gadael i'r gwallt fod yn glymau a mwynhau'r rhyddid - mae'r busnes yma o dyfu yn digwydd yn ddigon cyflym - heb unrhyw gymorth!
|
|
