|
Bu yn bnawn o lawen chwedl yng Nghapel Towyn, Cei Newydd ddydd Sul l4eg Mehefin 2009 - diwrnod dathlu canmlwyddiant yr Organ Fawr fel cyfrwng cyfoethogi'r gân a'r addoliad, gan gyplysu un oedd yn allweddol i'r dathlu, sef y diweddar Ddoctor Caradog Roberts, Rhosllannerchrugog, a gynllniodd yr organ.
Daeth tyrfa luosog iawn ynghyd, a braf oedd gweld llu o aelodau a oedd wedi eu codi i fyny yng Nghapel Towyn wedi teithio milltiroedd lawer i gadw oed yn yr oedfa arbennig a hanesyddol hon.
Darllenwyd o'r ysgrythur gan yr Athro Tecwyn Jones i ddechrau, ac yna cafwyd gweddi fer gan Ithela Evans. Yn dilyn hyn cafwyd gair o groeso a hanes yr organ gan Ithela Evans, Ysgrifennydd y Capel.
Clywyd canu gwefreiddiol gan y soprano Mari Ffion Williams a'r tenor Gareth Huw John,ac roedd aelodau'r gynulleidfa wedi eu hudo gan eu perfformiadau.
Mae'r ddau wedi cyrraedd yr uchelfannau ym myd cerddoriaeth. Braf oedd cael eu cwmni yn yr oedfa.
Bum yn ddigon ffodus i gael cwmni a gwasanaeth y Deon Gwlad, Chris Bolton fel ein horganydd gwadd. Cawsom ddatganiad a oedd yn dangos cyfoeth yr organ trwy gyfrwng cerddoriaeth o gyfnod Handel hyd at y presennol, gydag aelodau'r gynulleidfa wrth eu bodd.
Gwnaeth Jon Meirion Jones, Capel y Wig, gyfarch yr achlysur gyda thribannau a chyflwynodd argraffiad arbennig ohonynt wedi'u fframio i Gapel Towyn.
 |
Ìý
